Achiko Mefaridze - Nu edzebt sxvas

არჩილ მეფარიძე- დაიბადა საქართველოში, ქალაქ თბილისში 24 აპრილს. სიმღერა 2 წლის ასაკში დაიწყო, დაამთავრა ფიზიკა-მათემატიკური სკოლა, ასევე მუსიკალური სასწავლებელი, პარალელურად დიდ დროს უთმობდა სპორტს (ცურვა,ჩოგბურთი,ფეხბურთი, ჭოკით ხტომა). ყველასათვის მოულოდნელად აბარებს სამედიცინო ინსტიტუტში და მის სამკურნალო ფაკულტეტს წარმატების ამთავრებს კიდეც. სტუდენტურმა წლებმა მის შემოქმედებაში დიდი როლი ითამაშეს. იგი მრავალი სტუდენტური ფესტივალის ლაურიატი გახდა, როგორც რუსეთში ასევე ესტონეთში, პოლონეთში. მოგვიანებით აჩიკო აღმოჩნდა ქალაქ რიგაში(ლატვია), სადაც 2 წლის განმავლობაში სამძებრო სამაშველო სამსახურის ექიმ-უფროს ლეიტენანატად მსახურობდა.(სხვათაშორის მის ანგარიშზე 14 ნახტომია პარაშუტით). ამ 2 წლის განმავლობაში რაიმონდ პაულსთან, გუნარ როზენბერგთან და სხვა ცნობილ მუსიკოსებთან მოღვაწეობამ და მათთან ერთად სხვადასხვა ჯაზ-ფესტივალებში მონაწილეობამ აჩიკოს შემოქმედებაში გადამწყვეტი როლი ითამაშა. რამდენიმე წლის განმავლობაში აჩიკო ციხის რესპუბლიკურ საავადმყოფოში ქირურგად მუშაობდა. მას სიკვდილს გადარჩენილი მრავალი პატიმარი ჰყავს, რითაც მათი პატივისცემა დაიმსახურა. 90-იან წლებში ცნობილი საომარი მოქმედებების დროს, მუშაობდა ჯანდაცვის სამინისტროში, საგანგებო შტაბის უფროსად. მის მოვალეობებში შედიოდა დაჭრილ მეომართა გადანაწილება სხვადასხვა კლინიკებში. აგრეთვე საკვებ პროდუქტთა, მედიკანენტთა და ჰუმანიტარული დახმარების საომარ მოქმედებათა ცხელ წერტილებში გაგზავნა, რისთვისაც ღირსების ორდენით დაჯილდოვდა. 1999 წელს აჩიკომ ჩაწერა ახალგაზრდა ნიჭიერი კომპოზიტორის, რუსა მორჩილაძის მუსიკაზე შექმნილი სიმღერა „მითხარი”, რომელმაც უდიდესი აღიარება მოიპოვა არა მარტო საქართველოში, არამედ აზერბაიჯანსა და რუსეთშიც. ამაზე მეტყველებს თუნდაც ის ფაქტი, რომ „მითხარი” ხანგრძლივი პერიოდის განმავლობაში არ თმობდა სხვადასხვა ქვეყნის ჰიტაღლუმების მოწინავე ადგილებს. ამის შემდეგ აჩიკოს უმრავი ფანი გაუჩნდა. „მითხარის” მოჰყვა სხვა არანაკლებ წარმატებული სიმღერები და მათზე გადაღებული ვიდეოკლიპები „ნუ წახვალ“, „ჯადოსნური ქალაქი”, „უცხო ქალაქში”. ამ უკანასკნელმა განსაკუთრებული მოწონება დაიმსახურა. ეს სიმღერა II მსოფლიო ომში დაღუპულთა ხსოვნას მიეძღვნა და მის აქცია-კლიპში მონაწილეობა ყველა თაობისათვის საყვარელმა მსახიობებმა მიიღეს. აღსანიშნავია შემოქმედებითი დუეტები ლელა წურწუმიასთან, ვერიკო ტურაშვილთან, ნუცასთან და ნინი ქარსელაძესთან. 2001 წელს გამოვიდა მომღერლის ახალი ალბომი „ო! რა კარგია“. ეს ალბომი აჩიკომ 2002 წლის 31 მაისს თავის გრანდიოზულ სოლო კონცერტზე წარმოადგინა. ამ კონცერტში, რომლის შოუ-პროგრამამ მთელ ამიერკავკასიაში გაითქვა სახელი, მონაწილეობა მიიღეს მომღერლებმა საქართველოდან, აზერბაიჯანიდან და რუსეთიდან. თბილისში კონცერტს სხვა არანაკლებ წარმატებული კონცერტები მოჰყვა საქართველოს სხვადასხვა რეგიონში. 2002 წლის ივნისიდან აჩიკო მეფარიძე ბიზნესმენ ბადრი პატარკაციშვილის მიერ დაარსებულ საპროდიუსერო ცენტრის „არტ იმედის” წევრია. ამ კომპანიამ მის შემოქმედებით წინსვლაში დიდი წვლილი შეიტანა. 2003 წელს კი აჩიკო თავის მეგობრებთან ერთად აშშ-ში გაემგზავრა და ნიუ-იორკში, ნიუ-ჯერსიში და ფილადელფიაში კონცერტები გამართა. 2003 წლის სექტემბერში თბილისის იპოდრომზე გაიმართა სიმღერაზე „მშვიდობით” გადაღებული ვიდეოკლიპის პრეზენტაცია. კლიპი ჰოლანდიაშია გადაღებული. სიმღერის ავტორია რუსა მორჩილაძე, ტექსტის ავტორები კი დ.დოიაშვილი და ი.სანიკიძე. კლიპი 6 თვის განმავლობაში ლიდერობდა ტელე ჰიტ-პარადებში. 2004 წლის მაისში მომღერალმა გამოუშვა რიგით მესამე სოლო ალბომი, რომელშიც 12 სიმღერა შევიდა.